قعدت على كرسي المكتب في الضلمة، صوت المطرة بره كان بيزيد وقسوته بتزيد مع كل ثانية بتعدي. بصيت على الشاشة المظلمة بتاعة الموبايل. المسج كانت لسه محفورة في دماغي حرف حرف: “وجودك بيضايق بعض الناس”. الكلمة كانت أتقل من جبل، بس بدل ما تكسرني، عملت جوايا حالة من التبلد الغريب. حالة من الهدوء اللي بيسبق أي إعصار.
الست اللي عملت من العدم امبراطورية “الألفي للوجستيات”، الست اللي وقفت قصاد حيتان السوق في المينا وفي الجمارك، الست اللي عاشت تبني وتحمي، مش هي اللي يجي شوية عيال وسيدة مجتمع كرتونية يمسحوا تاريخها بمسج في أنصاص الليالي.
طلعت البلكونة المتقفلة بالجمالون، فتحت الشباك الخشب وسبت الهواء الساقع يلمس وشي. افتكرت سيف وهو عيل صغير، لما كان بيترماني في حضني لما يخاف من صوت الرعد. افتكرت لما سهرت جنبه بالليالي وهو عيان، وافتكرت لما جه مسك إيدي وهو بيبكي من ٦ سنين وكان هيدخل السجن في قضية شيكات بدون رصيد وتلاعب في أوراق شركة المقاولات بتاعته. يومها ما تفكيرتش مرتين، ضحيت بأسهم مهمة في البورصة، وسيحت سيولة كان المفروض تروح لتطوير أسطول النقل، وكل ده عشان أشتري الفيلا دي من البنك اللي كان حاطط إيده عليها، وأفك زنقته، وأكتبله عقد انتفاع بشرط إنه يحافظ عليها.
لكن القرش لما بيكبر في بيئة غلط، بينسى الإيد اللي أكلته.
الساعة جت ٧ الصبح. النور كان بدأ يشق السماء الرصاصية. قمت أخدت دوش دافي، لبست طقم أسود شيك جداً، بدلة من كريب الحرير، وحطيت البرفان اللي متعودة أحطه في الاجتماعات المصيرية. نزلت الصالون تحت، لقيت عم مجدي – السواق اللي معايا بقاله عشرين سنة – واقف مستنيني ومعاه كوباية القهوة المظبوطة بتاعتي.
“صباح الخير يا ماجدة هانم. العربية جاهزة، ومتر شريف كلمني وقال إنه في الطريق للفيلا.”
أخدت بوق قهوة ونزلت الفنجان بهدوء: “صباح النور يا مجدي. جهزلي عربية البوكس الضخمة، مش الكوبيه. النهاردة مش رايحين زيارة عادية.. النهاردة رايحين نرجع حق اتنسى.”
مجدي بصلي بفهامة ونظرة تقديرة، هو عاصر القصة كلها وعارف البير وغطاه. هَز راسه وقال: “أمرك يا هانم. ربك ما بيرضاش بالظلم.”
على الناحية التانية، في فيلا القطامية، كانت التجهيزات لعيد ميلاد زياد على أشدها. البالونات باللون الأزرق والفضي مالية الجنينة، الترابيزات المتغطية بمفارش ستان، البوفيه المفتوح اللي جايبينه من أكبر أوتيل في مصر، والدي جي اللي كان بيظبط الساعات والأجهزة.
سميرة الهواري كانت واقفة في نص الصالة، لابسـة فستان أوف وايت مشجر وشايلة نظارة الشمس على راسها، بتوجه الخدامين بالصوت العالي وكأنها المالك الأوحد للمكان.
“يا بنتي أسرعي شوية! الملازم والمستشارين جايين في السكة، مش عايزين أي حتة غبار على الكراسي! وشيرين.. فين سيف؟”
نزلت شيرين من الدور التاني، لابسـة فستان غالي جداً ومكياج كامل، بس كان باين على وشها التوتر. “سيف في المكتب جوه يا مامي، من ساع ما بعت المسج وهو مش على بعضه، قاعد يشرب سجاير ومش راضي يخرج.”
سميرة لوّت بوزها بانتصار: “مش على بعضه ليه يعني؟ هي أمه فاكرة نفسها مين؟ جاية تبوظ لنا شكلنا قدام الـ VIP اللي زمايلنا؟ كفاية قوي إنه طالع لها في شوية طباع بلدية، إنما النهاردة عيد ميلاد ابنك، والناس اللي جايين دول هما اللي هيفتحوا لسيف أبواب شغل جديد.. أمه دي كارت خلاويص.”
خرج سيف من المكتب، وشوشه أصفر، عينيه جاحظة وواضح إنه منامش دقيقة. بص لمراته ولأمها وقال بصوت واطي ومبحوح: “أمي ردت عليا بكلمة واحدة.. قالتلي (تمام). أنا خايف يا سميرة هانم.. أمي لما بتقول تمام وهي هادية كده، بيبقى وراها مصيبة.”
ضحكت سميرة بصوت عالي ومهين: “مصيبة إيه يا سيف؟ هتسحب منك المصروف؟ ولا هتفضحك؟ أنت كبرت خلاص، وبعدين الفيلا دي بتاعتك وأنت اللي ساكن فيها وبترفع راسنا بيها. اهدى كده واستقبل الناس، أول العربيات بدأت توصل بره.”
الساعة ٩:٥٥ الصبح.
كانت الجنينة اتملت على أخرها. أكتر من مية شخص من صفوة المجتمع، رجال أعمال، قضاة، وسيدات مجتمع، أطفال بيلعبوا حوالين البسين، وصوت الموسيقى الهادية شغال في الخلفية. زياد الصغير كان واقف فرحان بالهدايا الضخمة الملفوفة بفيونات ذهبية.
وفجأة.. صوت سرينة عربية شرطة قطع صوت الموسيقى!
الكل سكت ووقف يبص ناحية البوابة الحديدية الكبيرة للفيلا. دخلت عربية مرسيدس سوداء مصفحة، ووراها عربيتين بوكس شرطة، وعربية تالتة نزلت منها هيئة من الرجال بلبس رسمي ومحامين شايلين شنط جلد.
سيف قلبه وقع في رجليه، اتخنق والتنفس بقي صعب عنده. سميرة وشها اتغير وبقت تبص لشيرين بذهول: “إيه ده؟ هو فيه إيه؟ مين دول؟”
وقفت مرسيدس ماجدة الألفي في نص الصينية الرخام اللي قدام الباب الرئيسي للفيلا. مجدي نزل وسرعة ما فتح الباب الخلفي.
نزلت رجلي الأولى بجزمة جولد كلاسيك، وبعدين وقفت بطولي بكل كبرياء وقوة. كل العيون اتجهت عليا. ناس كتير من الحاضرين عرفوني، رجال الأعمال وقفوا بذهول، لأن ماجدة الألفي اسمها لوحده يزن دهب في السوق.
مشيت بثبات، وجنبي متر شريف العادلي، وورانا مأمور التنفذ، ورئيس مباحث القسـم، ومعاهم قوة شرطة وأربعة محضرين من المحكمة.
سيف جرى عليا وهو بيترعش، صوته كان طالع بالعافية: “أمي!! إيه.. إيه اللي بيحصل ده؟ إيه الشرطة دي؟ أنتِ جاية تعملي إيه هنا؟”
