الهديه كانت متغلفه بورق سيلوفان

​”ده كدب! ده تزوير!” شريف صرخ بصوت هيستيري وهو بيبص لنادين اللي كانت خلاص ركبها مش شايلاها وساندة على ضهر الكرسي، “نادين حامل! نادين جابت الولد! أنا شفت السونار وشفت التحاليل! إنتي بتألفي عشان تنتقمي مني!”
​التفت لثريا هانم اللي كانت مبرقة ومش قادرة تتنفس، وقلت لها بصوت مسموع للقاعة كلها:
​”اسألي نادين يا هانم.. اسأليها المعجزة دي حصلت إزاي؟ لما شريف مبيخلفش، والتقرير قدامكم أهو، الولد ده جه منين؟”
​نادين بدأت تعيط بهيستيريا، وصوت شهقاتها بقى عالي وسط القاعة:
​”شريف.. متصدقهاش.. دي غيورة وحاقدة.. دي جاية تبوظ بيتنا.. أنا بحبك.. الولد ابنك والله ابنك!”
​”ابنه إزاي يا نادين؟” صرخت فيها وأنا بطلع النسخة التانية من الملف وبحدفها في وشها، “النسخة التانية دي بقى هي تحليل الـ DNA للولد نفسه.. العينة اللي اتأخدت من السائل الأميوسي أثناء الحمل، والمقارنة مع عينات تانية. التقرير بيقول إن نسبة أبوة شريف للولد صفر، ونسبة أبوة حازم علام.. أخوه الصغير.. هي 99.99%! الولد ده ابن أخوه يا شريف! ابن حازم اللي واقف وراك وبيموت من الرعب!”
​الصدمة كانت تقيلة لدرجة إن القاعة كلها أصيبت بحالة من الذهول التام. مفيش مخلوق كان بيتحرك. شريف لف وشه ببطء شديد، كأنه بيتحرك في فيلم رعب، وبص لأخوه حازم. حازم رجع خطوة لورا، ووشه مليان دموع ورعب، وبدأ يهز راسه بالنفي وهو بيترعش:
​”شريف.. أنا.. أنا مكنتش أقصد.. هي اللي جتلي.. هي اللي قالت لي إنك مش هتخلف وإن العيلة هتروح.. هي اللي أغوتني يا شريف!”
​في ثانية واحدة، تحول المكان لساحة معركة. شريف هجم على أخوه زي الوحش الكاسر، مسكه من رقبتة وفضل يضرب فيه بوكسات بكل غل وعمى، وحازم بيحاول يهرب ويصوت. الكراسي اتقلبت، والترابيزات اتهزت، والناس بدأت تصرخ وتجري لورا من الخوف. ثريا هانم حطت إيدها على قلبها ووقعت على الكرسي المذهب وهي بتنهج ومش قادرة تاخد نفسها، ونادين رمت نفسها على الأرض وهي بتصرخ وتلطم على وشها، والفستان اللبني الشيك اتبهدل من الطين والعصير اللي كان واقع على الأرض.
​وسط كل الفوضى دي، والصريخ، والضرب، والدم اللي بدأ يسيل من وش حازم، والناس اللي بتقدم وبتحجز بين الأخوات، وقفت أنا في النص. بصيت لنادين اللي كانت سايحة في دموعها ومكياجها باظ وبقت شبه المسوخ، وبصيت لشريف اللي كان بيصرخ زي المجنون وكرامته ورجولته واسمه اتداسوا بالجزام قدام أعيان وعائلات مصر كلها.
​حسيت بنسمة هوا باردة وراحة مكنتش دوقتها من سبع سنين. النار اللي جوايا انطفت، وبقت رماد.
​نزلت على ركبتي نص نزلة، وشيلت الفلاشة الصغيرة من تحت رجليهم وحطيتها في شنطتي، وبصيت لنادين وقلت لها بابتسامة خفيفة وواطية مفيش حد سمعها غيرها:
​”معلش يا حبيبتي.. النصيب. عقبال ما تقدري تديله الولد اللي بيتمناه.. في المحكمة بقى.”
​وقفت، وعدلت الفستان الأسود بتاعي، ومشيت بخطوات واسعة وواثقة ناحية الباب الخارجي للقاعة. المعازيم كانوا بيوسعوا لي السكة برعب وزهول، كأنهم بيوسعوا لملك الموت وهو خارج بعد ما أدى مهمته.
​طلعت برة القاعة. المطر كان لسه شغال، بس الجو مكنش كئيب بالعكس، كان بيغسل كل الوجع القديم. وقفت على الرصيف وطلعت تليفوني، وطلبت لبنى المحامية.
​”أيوة يا لبنى.. العرض خلص. تقدري دلوقتي حالا تقدمي بلاغات التهرب الضريبي وتزوير عقود الشركة للنائب العام. عيلة علام جروب الليلة دي انتهت خلاص، ومش هيفضل منهم غير الفضيحة.”
​قفلت السكة مع لبنى، ووقفت تاكسي وركبت. وأنا ببص من الشباك على أنوار التجمع وهي بتختفي ورايا، تليفوني رن برقم غريب. رديت وأنا مستغربة:
​”ألو؟”
​جالي صوت راجل، هادي جداً، وواثق، بس فيه نبرة غامضة خلت شعر جسمي يقف:
​”برافو يا شيرين.. برافو بجد. اللي عملتيه الليلة دي كان عرض سينمائي ممتع جداً.. وأنا استمتعت بيه لآخر لحظة وأنا قاعد وسط المعازيم.”
​دمي اتجمد في عروقي.
​”إنت مين؟ وعايز إيه؟”
​الراجل ضحك ضحكة واطية ومرعبة، وقال:
​”أنا اللي ساعدت المعمل إنه يبعتلك التقارير دي في الوقت المناسب بالظبط.. وأنا اللي عارف إنك مش بس دمرتي عيلة علام عشان تآخدي حقك.. أنا عارف السر اللي إنتي مخبياه عن عيلتك إنتي كمان يا شيرين.. السر اللي لو طلع، تمنه هيكون أكبر بكتير من فضيحة شريف ونادين. اشوفك قريب.. عشان الشغل الحقيقي لسه هيبدأ.”
​الخط قطع. التاكسي كان بيجري في طريق السويس الضلمة، والمطر بيزيد، وأنا قعدت مكاني، مبرقة للتليفون، وقلبي اللي كان ارتاح من ثانية، بدأ يدق بعنف وخوف أكتر من الأول.. الحكاية مخلصتش.. الحكاية شكلها لسه بتبدأ!