دخل قاعة الاجتماعات وخطواته بترج المكان، المحامي بتاعه بيضحك باستهزاء: تخيل يا فندم أهالي الحتة جابوا محامية تحت التمرين، وكمان جايبة معاها طفل صغير! شكلهم بيستعطفونا.
عمر مابصش ناحيتهم، قعد على كرسي رئيس مجلس الإدارة وفتح اللاب توب بتاعه ببرود.
“خمس دقايق والورق ده يكون ممضي بالتنازل.. معنديش وقت لمهزلة.”
صوتها طلع من الناحية التانية.. هادي، ثابت، وفيه برودة:
“الورق ده يتبل ويتشرب ميته يا عمر باشا.. قرار هدم الحي بتاعنا وقف بحكم محكمة، وإحنا مش هنبيع.”
إيده اللي كانت بتقلب في الملف وقفت.
رفع عينه ببطء. شافها.
نفس الملامح البريئة اللي كانت قدامه كل ليلة من 6 سنين. بس انطفت وبقت قاسية. نفس الست اللي اختفت وتاريخها انتهى بحادثة ومشاكل خلوه يدفنها وهي غايبة.
بس دلوقتي.. واقفة قدامه بشموخ، وجنبها على الكرسي طفل صغير، بتاع خمس سنين، بيلعب في مكعباته.. طفل بشعر أسود كثيف، وعيون رمادية، ونفس تقطيبة الحواجب بتاعته بالظبط!
الهوا اتسحب من القاعة.
المحامي بتاع عمر زعق: “إنتي إزاي تتجرأي وتتكلمي مع عمر باشا الجارحي بالأسلوب ده؟”
عمر رفع إيده بحركة واحدة خرست المحامي. عينه ماتحركتش من عليها، ولا من على الطفل اللي بصلها وقال بصوت طفولي بريء:
“ماما.. يلا نمشي، الراجل ده بيبصلنا وحش بيخوف.”
عمر بلع ريقه. قلبه اللي مات من 6 سنين رجع ينبض بسكينة، بس وشه.. فضل زي ما هو.
عمر بصوت متحشرج وواطي جداً:
“الكل يطلع بره.. حالاً.”
المحامين بصوا لبعض برعب وانسحبوا فوراً. مريم لمّت ورقها بسرعة، مسكت إيد ابنها وجت تخرج وراهم.
عمر بخطوة واحدة كان عندها، وقفل الباب برجله بقوة قفلت السكة عليها.
”على فين؟” قالها وهو بيقرب منها، الطول والعرض بتاعه والهيبة كانوا مغطيين عليها تماماً.
مريم رفعت راسها بتحدي، عينيها في عينيه مباشرة رغم إن شفايفها كانت بتترعش على خفيف:
“اجتماعنا خلص يا بشمهندس.. بينا المحكمة.”
عمر نزل ببطء لمستوى الطفل، عينه دمعت لأول مرة، مد إيده المرتعشة عشان يلمس وش الولد، بس مريم شدت الطفل وراها بخوف.
عمر وقف تاني وبصلها، صوته كان حاد:
“المحكمة إيه يا مدام مريم؟ إنتي هترجعي معايا على القصر.. إنتي وابني اللي عيشتيني 6 سنين في عزا كداب!”
مريم ابتسمت بوجع ودموعها نزلت بتحدي:
“ابنك مات يا عمر.. مات في اليوم اللي رميتني فيه في الشارع وأنا حامل في الشهر التالت عشان ترضي عيلتك.. زي ما أنا مت بالظبط.”
عمر مسك دراعها بقوة وعينه بتطق شرار:
“ومين قالك إني هسمح للميتين يهربوا مني تاني؟ الولد ده هيرجع لبيت الجارحي.. بيكي.. أو من غيرك.”
مريم ما اتهزتش، بصت لإيده اللي ضاغطة على دراعها، وبعدين رفعت عينيها لعينيه ببرود:
“شيل إيدك عني يا بشمهندس.. الزمن اللي كنت بترعبني فيه بصوتك العالي، أو بنفوذ عيلتك.. انتهى.”
قبل ما عمر يرد، حس بضربات صغيرة وقوية على رجله. نزل عينه لاقى الطفل الصغير، بيضربه بقبضة إيده الصغيرة وعيونه الرمادية مليانة دموع.
“سيب ماما يا شرير! ابعد عنها أنا هضربك!”
الكلمة نزلت على قلب عمر زي النار. ابنه اللي اتحرم منه 6 سنين، أول كلمة يقولهاله هي “شرير”؟
إيده ارتخت غصب عنه. مريم استغلت اللحظة وشدت دراعها، وراحت مخبية زين ورا ضهرها كأنها بتحميه.
مريم بصوت بيترعش من كتر الكتمان:
