“شايف؟ ده كل اللي فاضل منك جواه.. الرعب، والكره. إنت لا يمكن تكون أب، إنت آلة ماشية تدوس على كل اللي حواليها عشان تكبر إمبراطورية الجارحي.”
عمر قفل قبضة إيده لحد ما عروقه برزت، وشه اتحول لملامح غضبانة، وقرب منها لحد ما أنفاسه لفت وشها:
“الكره بيتنسي يا مريم.. والفلوس بتمسح أي حاجة. وابني.. مش هيتربى في حواري وزقايق، ابني هياخد مكانه الطبيعي في القصر.”
مريم ضحكت باستهزاء، ضحكة وجعته أكتر من شتيمتها:
“قصر؟ القصر اللي طردتني منه في عز المطر وأنا حامل في التالت عشان هانم مامتك قالتلك إني طمعانة فيكم؟ القصر اللي خليت الحرس يرموني بره من غير حتى ما تسمعني؟”
عمر عقد حواجبه بصدمة حقيقية، صوته طلع مخنوق: “أنا طردتك؟ إنتي اللي هربتي بعد ما سرقتي خزانة المكتب! إنتي اللي بعتيلي ورقة تنازل عن حقوقك!”
مريم عينيها وسعت، بس بسرعة استعادت ثباتها وابتسمت بسخرية:
“لعبة قديمة أوي يا عمر.. عموماً، أنا مش مريم الضعيفة. أنا المحامية مريم عبد الرحمن، ولو فكرت بس تقرب من ابني.. ملفات فساد مناقصة العاصمة الإدارية اللي شركتك داخلة فيها، واللي أنا ماسكة قضيتها، هتكون على مكتب النائب العام بكرة الصبح.. سلام يا بشمهندس.”
شالت زين على إيدها، وفتحت الباب وخرجت بخطوات ثابتة، سابته واقف في نص القاعة.. الأرض بتلف بيه، والهوا هرب من رئتيه.
مكتب عمر – بعد ساعة
طارق، مدير الأمن الخاص بيه وصندوق أسراره، واقف مذهول قدام المكتب اللي كان متكسر نصه، وإزاز اللاب توب متدش على الأرض.
عمر كان واقف بيدي ضهره لطارق، بيبص من الإزاز البانوراما على القاهرة تحت رجليه، وإيده بتنزف دم من خبطة في المكتب.
“يا فندم.. اللي حضرتك بتقوله ده مستحيل! إحنا دفناها بإيدنا! تقرير المستشفى وكل حاجة أثبتت إنها ماتت في الحادثة على طريق إسكندرية!” طارق قالها وهو بيبلع ريقه.
عمر لف ببطء، عينه كانت حمرا زي الدم، وصوته كان هادي هدوء ما قبل العاصفة:
“الست اللي كانت هنا من شوية، هي مريم. والولد اللي معاها.. نسخة مني. تقلب مصر يا طارق.. تجيبلي دبة النملة. مين ساعدها؟ عاشت إزاي 6 سنين ومين بيصرف عليها؟.. في خلال ساعتين الملف ده يكون في إيدي، وإلا تعتبر نفسك مرفود.”
“تحت أمرك يا فندم.” طارق انسحب بسرعة البرق.
عمر قعد على الكرسي، مسح وشه بإيده اللي بتنزف، ومسك صورة قديمة في درج مكتبه. صورة لمريم وهي بتضحك. دمعه نزلت غصب عنه ومسحها بسرعة.
“والله لتدفعي تمن كل دمعة نزلت مني عليكي يا مريم.. وكل لحظة اتحرمت فيها من ابني.”
حي السيدة – الساعة 11 مساءً
مريم ماشية في الحارة، شايلة زين اللي نام على كتفها من التعب. ظهرها واجعها، وقلبها مقبوض.
المواجهة بتاعة الصبح سحبت كل طاقتها. كانت عارفة إن عمر مش هيسكت، بس ما تخيلتش إنه هيكون بالسرعة دي.
فجأة.. نور كشافات عربيات عالي جداً ضرب في آخر الحارة.
كلاب الحارة بدأت تهوهو بصوت عالي، والناس اللي كانت قاعدين على القهاوي وفي البلكونات وقفوا يبصوا برعب.
تلات عربيات جيب سودا، سدوا مدخل الحارة تماماً.
الباب اتفتح، ونزل منه عمر الجارحي.
بدلته السودا، طوله، وهيبته خلوا الحارة كلها تسكت.
عمر كان بيمشي ببطء، وعينه متثبتة عليها هي بس. مريم رجعت خطوتين لورا، حضنت زين أكتر، وحست إن الأكسجين بيخلص.
الرجالة بتوع عمر انتشروا في ثواني، سدوا أي طريق للهرب.
عمر وقف قدامها على بعد متر واحد. عينه كانت بتفحص ملامحها المرهقة، ولبسها البسيط، وقال بصوت مليان قسوة وتملك:
“فاكرة إنك هتقدري تستخبي مني هنا؟ قولتلك ابني هيرجع لبيته.. ودلوقتي.”
مريم شدت في حضنها على زين اللي بدأ يصحى، وقالت بصوت عالي عشان أهل الحارة يسمعوا:
“لو قربت مني خطوة واحدة، هلم عليك الناس دي كلها.. دول أهلي وناسي.”
عمر ابتسم بجنب شفته باستهزاء، ولسه هيرفع إيده عشان يشاور لرجالته..
حصلت حاجة وقفت الدم في عروق الكل.
من الورشة اللي ورا مريم، طلع شاب طويل، لابس قميص وبنطلون جينز وإيده فيها شحم خفيف. الشاب جرى على مريم بلهفة، وأول ما زين شافه، صرخ بفرحة وهو بيمد إيده ليه:
“بابا حازم!! الحقني يا بابا الراجل الشرير جه تاني!”
الشاب (حازم) شد زين من حضن مريم وشاله، ولف إيده التانية بحماية حوالين وسط مريم، وبص لعمر بتحدي وجرأة:
“خير يا باشا؟.. في حاجة مزعلة مراتي وابني؟”
الدنيا وقفت.
الزمن اتجمد.
عمر الجارحي عينه نزلت على إيد حازم اللي محاوطة وسط مريم.. وبعدين طلعت لوش مريم اللي نزلت عينيها في الأرض بتوتر.
وش عمر اتحول لكتلة من السواد والغضب.. الغضب اللي جواه في اللحظة دي كان كفيل يحرق الحارة.
”مراتك.. وابنك؟” عمر قالها بصوت فحيح، وإيده بتتحرك ببطء ناحية حزامه..
أخد نَفَس عميق، والهدوء اللي ساد الحارة كان هدوء مريب.. هدوء قبل الإعصار. عمر هدى، ونزل إيده ببطء وهو بيبتسم ابتسامة باهتة ومخيفة، ابتسامة اللي شاف كل ورق اللعبة وعارف إنها خسرانة.
قرب من “حازم” لحد ما بقوا في وش بعض، حازم رغم إنه شاب وجدع، بس هيبة عمر خليته يشد على وسط مريم أكتر.
عمر بصوت واطي بس حاد:
“مراتك؟.. أنت عارف أنت بتقول إيه يالا؟ أنت بتلعب في عداد عمرك.”
حازم ما تراجعش، وبص في عين عمر بنظرة تحدي:
“الرزق عند الله، والأعمار بإيد ربنا.. مريم مراتي، وزين ابني، والحارة دي محمية بجدعانها، مش بشركاتك وموظفينك. يا ريت لو سمحت تاخد رجالتك وعربياتك دي وتتفضل، عشان وجودك هنا بيضايق عيلتي.”
عمر ضحك ضحكة قاسية، خلت الحارة كلها تقشعر. لف بجسمه وبص لـ مريم اللي كانت واقفة زي التمثال، وشها أبيض زي الورق، عيونها بتصرخ بالخوف والذكريات.
“عيلتك؟.. مريم هانم، يا محامية يا شاطرة، نسيتي تقولي لجوزك الجديد مين هو عمر الجارحي؟ نسيتي تقولي له إن اللي بيحاول يوقف في طريقي بيختفي من الخريطة؟”
مريم خدت نفس طويل وقالت بصوت بيحاول يبان ثابت:
“عمر.. سيبنا في حالنا. اللي بينا انتهى من 6 سنين، ولو فاكر إنك بالمنظر ده وبالرجالة اللي جايبهم وراك هترهبني، تبقى لسه ما عرفتش مريم اللي قدامك دي بقت مين.”
عمر قرب منها خطوة، وسحب التليفون من جيب بدلته، وفتحه على صورة كانت مبعوتة ليه.. صورة لحازم وهو داخل “نيابة الأموال العامة”، وصورة تانية لعقد بيع أرض عليه إمضاء حازم.
رمى التليفون قدام رجلي حازم وقال ببرود:
