صوت الخشب وهو بيتشق تحت ضربات رجليهم كان بيرن في وداني زي طبول الحرب. البيت القديم اللي عشت فيه سنين في هدوء كان بيتهز، وصوت حسام برة كان واصلني وهو بيزعق للعساكر: “اخلصوا! اهدوا الباب ده بسرعة!”، وقفت قدام الشاشة اللي منورة باللون الأزرق الفسفوري، وبصيت على جملة “تم تفعيل بروتوكول الطوارئ الأقصى” وأنا حاسة بدمي اللي كان بارد بقاله سنين بيغلي فجأة، نسيت سني، ونسيت رعشة إيدي، ونسيت الست العجوزة الكركوبة اللي كان حسام بيتمسخر عليها من دقيقتين.
حطيت الطبنجة الميري في حزامي من ورا، وقفلت اللاب توب العسكري وحطيته في الشنطة وبسرعة البرق رميتها ورا الكنبة، الضرب على الباب زاد والترباس الحديد بدأ يتلوى، مشيت بخطوات ثابتة ووقفت ورا الباب بالظبط، وبعلو صوتي قولت: “وسع أنت وهو من قدام الباب عشان هفتحه، بدل ما تكسروه وتدفعوا تمنه”، الحركة برة هديت فجأة، وسحبت الترباس وفتحت الباب على الآخر.
الهوا البارد والمطر لطشوا في وشي، وقدامي كان واقف العقيد مجدي وبجنبه حسام غالي ولابسين هما الاتنين جواكت جلد سودا غرقانة ميه، ووراهم أربعة عساكر مسلحين متبهدلين من المطر، حسام أول ما شافني عينيه لمعت بغل وزقني بكتفه وهو داخل وبيقول: “أهو ريحتينا ووفرتي علينا تمن الباب، فين سيف؟”، العقيد مجدي دخل وراه وبصلي بنظرة كلها كبرياء وظلم وقال: “يا ست نادية، إحنا مش جايين نعمل مشاكل، هاتي الواد عشان أبوه ياخده ونمشي، وبلاش موضوع والخرافات دي عشان متقعديش بقية عمرك في السجن بتهمة البلاغ الكاذب وتشويه سمعة ناس محترمة”.
وقفت ساندة ضهري على الحيطة، مربعة إيدي وبكل برود الدنيا قولت لهم: “البيت قدامكم اهه، دوروا عليه، لو لقيتوه خدوه”، حسام وشه اتقلب وشاور للعساكر وقالهم: “اقلبوا البيت حتة حتة، فتشوا الأوض والدواليب وتحت السراير، الواد هنا أنا متأكد”، العساكر انتشروا في الصالة وبدأوا يخبطوا في الحوايط ويفتحوا الأبواب، وحسام فضل يلف في الصالة زي الديب الجعان، عينيه كانت بتدور على أي أثر، وفجأة عينه جت على بقع الدم الصغيرة اللي سيف سابها على الأرض وهو حافي.
حسام ضحك ضحكة مقرفة وبصلي وقال: “سايب أثره وراه الغبي.. طالع لم أمه”، ومشى ورا نقط الدم لحد ما وصل للمطبخ، ودخل وراه العقيد مجدي وأنا مشيت وراهم بكل ثبات، حسام بص على ترابيزة المطبخ ولقى فوطة مبلولة وفيها أثر طين، وبص في الأرض لقى النقط واصلة لحد باب المخزن الصغير، لف وشه ليا وقال: “فاكراني مغفل يا نادية؟ المفتاح فين؟”، قولتله: “المخزن كركوبة ومقفول بقاله سنين والمفتاح ضايع”، حسام مفيش ثانية وكان رافع رجله وضارب الباب الخشب بتاع المخزن بكل قوته، الباب اتقلع من مفصلاته ووقع جوه وعمل دوشة فظيعة.
العساكر جريوا على المطبخ، وحسام دخل المخزن وبدأ يرمي الكراسي القديمة والكراتين في كل حتة، لحد ما وصل للزاوية اللي فيها شوالين الرز، زق الشوال الأولاني والتاني، وظهرت قدامه الأرضية الخشبية القديمة، بس مكنش فيه أي باب حديد ظاهر، لأن الباب السري كان متقفل ومدهون بنفس لون الخشب وبطريقة مستحيل حد يشوفها بالعين المجردة إلا لو عارف الزرار السري فين، حسام قعد على ركبه وبدأ يخبط على الأرض بإيده، وصوت الخشب كان مكتوم، مكنش فيه صوت فراغ.
وقف وبصلي وهو بينهج من الغل وقال: “الواد فين؟ وربنا لو ما قولتلي فين لأكون دافنك مكان ما دفنت أمه”، العقيد مجدي اتدخل وقال: “جرى إيه يا حسام بيه؟ اهدى شوية متوسخش إيدك مع واحدة كركوبة، قولي يا ست يا عجوزة أنتي، الواد ده هربان فين؟”، بصيت للعقيد وقولتله: “يا سيادة العقيد، أنت راجل قانون، ومينفعش تقف تتفرج على واحد مقتول مراته وبيهدد حماته في بيتها، فتشوا عربية حسام.. فتشوا شنطة العربية وشوفوا السجادة الحمراء اللي فيها بنتي مريم”، العقيد مجدي ضحك بصوت عالي وقال: “إيه وسجادة إيه؟ حسام بيه ده رجل أعمال محترم، والمدام بتاعته كلمته لايف فيديو من ساعة وهي في مارينا بتصيف، أنتي شكل الخرف أثر عليكي وقريب قوي هنقلك لمصحة أمراض عقلية”.
عرفت في اللحظة دي إن العقيد مجدي مش مجرد ضابط جاي ينفذ شغل، ده متغرق بفلوس حسام لحد ودانه، ومستعد يعمل أي حاجة عشان يغطي عليه، حسام قرب مني ومسكني من رقبة الجلابية وبص في عيني وقال بصوت واطي ومرعب: “هتقولي فين الواد ولا أهد البيت ده حتة حتة فوق نفوخك؟”، في اللحظة دي، ضغطت بصوبعي الصغير على زرار صغير كان مستخبي في حزامي، والزرار ده كان متوصل بجهاز التشويش اللي في اللاب توب العسكري جوه، فجأة، كل أجهزة اللاسلكي اللي مع العساكر بدأت تطلع صوت وشوشة عالي ومزعج جداً، وشبكات الموبايل كلها في المكان ماتت.
حسام سابني وطلع تليفونه لقى مفيش شبكة خالص، والعقيد مسك اللاسلكي وهو بيحاول يكلم المديرية بس مكنش فيه أي استجابة، في وسط الزيطة دي، سمعنا صوت عربيات كتيرة بتفرمل برة البيت، وصوت كشافات قوية جداً نورت الصالة من الشبابيك لدرجة إن الدنيا بقت كأنها الضهر، حسام وبص للعقيد وقاله: “أنت جبت قوات تانية معاك؟”، العقيد مجدي وشه جاب ألوان وقال: “لا والله، أنا مجبتش غير العساكر دول”، طلعنا كلنا للصالة، وبصينا من الشبابيك.
المنظر برة كان يخض، تلات عربيات جيب سودا مصفحة، مفيهاش نمر، ونازل منهم رجال مقنعين لابسين لبس أسود كامل ومسلحين بأسلحة أوتوماتيكية تقيلة مش بتاعة الشرطة العادية، وفي ثانية واحدة، الباب الرئيسي اضرب بقنبلة صوت طيرت الباب ودخلت القوات دي زي الإعصار، العساكر بتوع العقيد مجدي من الخضة رفعوا إيديهم وركعوا في الأرض والأسلحة بتاعتهم وقعت منهم، العقيد مجدي طلع طبنجته وهو بيترعش وزعق: “أنتوا مين؟ أنا العقيد مجدي رئيس مباحث..” وقبل ما يكمل كلمته، واحد من المقنعين ضربه بكعب الرشاش في بطنه وقعه على الأرض وهو بيتلوى من الألم.
