
مرت ثلاث سنين كاملة على الليلة دي..
سيف كمل علاجه وخف تماماً، واشتغل في شركة مقاولات صغيرة، وبقى إنسان تاني خالص.
ملك دلوقتي عندها 9 سنين. في سنة رابعة ابتدائي. بتضحك، بتلعب، ورجعت صحتها.. عايشة معايا ومع أحمد وعمر ابني.
بس آثار الخزينة لسه جروحها جواها. لحد النهاردة ملك مبتعرفش تنام في الضلمة، ولابد باب أوضتها يفضل مفتوح.
وفي يوم.. كنا قاعدين بنوضب الأوضة القديمة بتاعت عمر عشان نعملها مكتبة. ملك كانت بتساعدني وبترتب الكتب. فجأة.. شفتها وقفت في نص الأوضة، ومسكت كتاب أزرق صغير غلافه جلد. جسمها اتجمد.. والألوان اختفت من وشها فوراً.
جريت عليها مسكت إيدها:
— ملك! حبيبتي في إيه؟! ده مجرد كتاب رسم بتاع عمر!
ملك رفعت عينها ليا.. العينين الصغيرين دول اللي شافوا اللي محدش يستحمله. قالت بصوت واطي جداً:
— طنط مريم.. أنتِ فاكرة إن الأجندة الزرقاء بتاعة تيتا كانت واحدة بس؟
قلبي وقع في رجلي:
— يعني إيه يا ملك؟!
ملك قربت مني ووشوشتني بالكلمة اللي خلت الدم ينشف في عروقي:
— تيتا لما كانت بتقفل عليا الخزينة.. كانت بتخليني أشيل الشنطة التانية أحطها في العربية بتاعة الدكتور.. وكان فيها ثلاث أجندات حمراء.. مكتوب عليهم أسامي الناس الكبار اللي خدوا الأطفال.. وتيتا قالتلي لو حصلها حاجة.. أروح للعنوان اللي مكتوب في ظهر الصورة دي!
ملك مدّت إيدها الصغيرة في جيب بليزر المدرسة بتاعها.. وطلعت صورة قديمة متطبقة أربع تطبيقات. فتحتها قدامي..
في الصورة.. كانت أمي هدى واقفة في مناسبة كبيرة، وجنبها شخصية معروفة جداً وشه بيبان في الإعلام.. وفي ظهر الصورة، مكتوب بخط أمي:
«إلى شريكي العزيز.. الأجندات الحمراء في أمانتك لو السلسلة انقطعت.»
صوت رعد شديد ضرب برة الشباك.. المطر بدأ ينزل تاني.. والتليفون اللي على الترابيزة جنبنا.. بدأ يرن.
بصيت للشاشة..
الرقم كان: “رقم غير معروف”..




