لكن وشها يومها… ما كانش وش واحدة مقتنعة ولا بتقدر الظروف. كان وش واحدة حاسة إن حقها الطبيعي اللي اتعودت عليه بيتسحب منها عافية، وكأن أحمد ده شغال عند أبوها!
ومن اليوم ده… حسيت إن معاملتها اتغيرت ١٨٠ درجة. السلام بقى بارد وناشف طالع من طرف مناخيرها. والابتسامة المزيفة اختفت كأنها مكنتش موجودة. والطلبات بقت أكتر وأعنف، كأنها بتعاقبنا على كلمة لا اللي قلتها لأول مرة.
وأنا كنت بعدّي، وبقول كبر دماغك يا أم أحمد، بكرة تروق وتهدى، لحد ما جت الليلة الصعبة… الليلة اللي غيرت كل حاجة وقطعت حبل الصبر من جذوره.
الساعة كانت داخلة على عشرة بالليل، والبرد كان شديد برة، والبيت هادي. كنت قاعدة على الترابيزة براجع مع بنتي مريم جدول الضرب والإملاء، والولاد التانيين نايمين أو في حالهم.
وفجأة…
دق… دق… دق…
خبط شديد وعنيف على الباب، كأنه حد عايز يكسره مش يفتحه!
قمت بخضة، وقلبي انقبض، وفتحت الباب بسرعة وأنا بقول: خير يا رب؟
لقيتها واقفة قدامي، وشعرها منكوش شوية، وعلى وشها علامات استعجال وغضب غريب، مش قادرة تداريه. قالت بسرعة من غير سلام ولا كلام:
— الحقيني! كارت الرصيد خلص والكهرباء هتقطع عندي، وكنت بكلم أمي في بلدنا في موضوع مهم ومصيري… ابعتي أحمد ينزلي يشحنه بسرعة من الكشك اللي على الناصية.
بصتلها بهدوء، وحاولت أظبط أعصابي وسط الليلة دي، وقلت:
— أحمد لسه في الدرس يا سماح، متأخر.
بصتلي باستغراب شديد وعينيها بتطلع شرار، وقالت بصوت عالي:
— درس إيه اللي الساعة عشرة بالليل يا أم أحمد؟ أنتم بتشتغلوني؟
قلت بنفس الهدوء، مع إن الدم بدأ يغلي في عروقي:
— يا ستي عنده امتحانات زي ما انتي عارفة، وبعد الدرس راح عند المستر يصور ورق مراجعة مهم وهيتاخر شوية.
سكتت ثانية كاملة، وبصت لجسمي كله نظرة تقييم مستفزة، وبعدين قالت الجملة اللي خلت الدم يتجمد في عروقي ويقف في زوري:
— خلاص ولا يهمك… خلي مريم بنتك تنزل تشحنه.
فضلت أبصلها ثواني طويلة… مش مستوعبة أنا سمعت إيه بظبط، ولا هي بتفكر في إيه!
وبهدوء شديد، وبصوت واخد نبرة غضب مكتوم سألتها:
— بنتي؟!
قالت بمنتهى البساطة والبرود، ولا كأنها بتقول كارثة:
— أومال إيه ياختي؟ هي العيال دي قاعدة بتعمل إيه؟ ما هو الشغل للكل… ولا علشان هو ولد وهي بنت؟ ما هي قعدتكم دي اللي بتدلعهم وتخليهم طريين!
الكلمة نزلت على ودني زي الصاعقة الكهربائية.
مش مصدقة إن دي الست اللي كنت باكلها من أكل بيتي، واللي كنت بقول لابني دايماً ساعد طنط عشان أربيه على الجيرة والأصول وشهامة ولاد البلد!
طلعت مش شايفة الناس حواليها بني آدمين بيحسوا ويتعبوا… كانت شايفاهم مجرد خدامين تحت أمرها وفي خدمتها ٢٤ ساعة، ولما ابنها الباشا تالتة إعدادي قاعد في التكييف والمذاكرة والدلع، كانت بتستخصر ده في عيالي أنا، وعايزة تمد إيدها كمان لحد بنتي الصغيرة وتنزلها الشارع في نص الليل!
لميت نفسي، وقبل ما أعصابي تفلت وأقول كلام أكبر من كده، بصيت لها نظرة أخيرة حارقة، وقولت بنبرة ناشفة وواضحة زي الصخر:
— بنتي مش بتنزّل الشارع بالليل يا جارتي… وابني خلص خدمات لحد هنا، ومن النهاردة مفيش لا أحمد ولا مريم. تصبحي على خير.
وقبل ما تفتح بوقها بحرف واحد تدافع بيه عن نفسها أو تكمل باحة… قفلت الباب في وشها بكل قوة وثبات!
طقطقة القفل وهو بيتقفل وبيتكتك كانت أحسن حاجة سمعتها من ست شهور بحالها.
سمعتها برة على السلم بتبرطم بكلام غير مسموع من كتر الصدمة والغل، وخبطت برجليها على درجات السلم وهي نازلة، بس مكنش يهمني خالص.. اللي كان يهمني ساعتها هو إن بيتي اتقفل في وش حد ما يستاهلش نقطة معروف واحدة.
تاني يوم الصبح، وأنا نازلة أجيب طلبات البيت، مريت قدام شقتها وكانت فاتحة الباب بتنفض السجادة. بصتلي نظرة كلها حقد وغل وشر، وكأنها بتقول بعينيها: أنا هوريكِ، مبقاش أنا لو ما انتقمتش!
لكن أنا دخلت شقتي وقفلت بابي ورايا بهدوء، وأنا حاسة بريحة راحة غريبة جدًا مالية قلبي وروحي.. راحة إني خسرت جارة كدابة ومستغلة، بس كسبت نفسي، وكسبت ولادي وحمايتهم وكرامتهم اللي ما تساويهاش كنوز الدنيا.
ومن يومها… اتعلمت درس عمري اللي عمري ما هنساه أبداً:
المعروف حلو وجميل، بس لازم يكون للناس اللي تعرف أصله وتصونه، مش للناس اللي تفتكر إن طيبتك ضعف وخنوع، وتعتبر باب بيتك باب خلفي لخدماتها.. لأن باب بيتي ده أمان ولادي وستر بيتي، وخط أحمر ممنوع الاقتراب منه!
